منورنا والله !!!

لو بصينا علي اي زياره في البيت من اي اسره مصريه لاي اسره مصريه حنلاقيها استمبه نفس الحاجات و التصرفات بتحصل مع كل الناس و كل الناس بيعملوها مثلا

اول ما تتدخل عند قرايبك البيت و انت لسه علي العتبه تلاقي زي صوت جز علي السنان خفيف مع تبريقه و طرقعه في الصوابع علشان تقلع الشوز قبل ما تدخل, و الحركات بقي اول ما تبتدي تقلع يقولولك ليه كده خليك براحتك!!

اول القاعده حوالي نص ساعه كلام عن الحر و الرطوبه و العطش تلاقي نفسك اصلا فرهدت من الكلام

بعد شويه تلاقي الناس اتقسمت معسكرات معسكر الستات و الكلام كله بيتمحور حول الطماطم و الكوسه وبتستخدمي اي نوع من السمنه و البند الجديد الاسعار اللذيذه بتاعه اليومين دول

المعسكر التاني معسكر الرجال و كل الكلام بيكون يا علي الكوره يا علي الموبايلات يا علي العربيات

المعسكر التالت الاولاد الصغيرين اول ما بتلموا علي بعض يلعبوا حرب و تلاقي كميه مسدسات غريبه و نط من عل السرير و موت موت يا ابني انا بموتك موت!,او تلاقيهم متنحين في الكمبيوتر و بيلعبوا حاجه فيها موت برضه!

المعسكر الرابع البنات الصغننين بيلعبو بالعرايس و هارينهم تلوين علي وشهم و تغيير في هدومهم

المعسكر الخامس ده مكون مني انا او اللي زي حالاتي اللي مش منتمين لاي معسكر ولا هما كبار يقعدوا مع الكبار و لا صغننين , و عمالين بيلفوا في البيت او بيتفرجوا علي التليفزيون

حوالي ساعه الا ربع كمان و يالا اتغدوا معانا لا و الله احنا لسه واكلين -نفسي اعرف الناس ليه بياكلوا و ينزلوا المهم- و طبعا حتلاقي نفسك محشور في كرسي السفره و بتاكل عادي جدا

بعد شويه الشاي للكبار و حاجه ساقعه او عصير للصغيرين -بصراحه انا ابتديت احس اني كبرت لما بقي يتعملي شاي في الزيارات - طبعا هما مش بياخدوا رأيك الا في موضوع السكر غير كده انت حتشرب الشاي غصب عنك.

في و قت الشاي كل الكبار بيتكلوموا في اي حاجه في الدنيا ة اول ما الكلام يخلص الجمله الرسميه منورنا والله يا جماعه و لو تعد مش حتقل في الزياره الواحده عن حوالي 19 مره .

خلاص بقي قرار انهاء الزياره بيبتدي ببصه من الاب للام (الزوار) لها معني كفايه كده ايه رأيك نمشي تقوم الام تبصي بنظره معناها اه كفايه كده .

الاب يقوم و يقول نستأذن بقي و الاب التاني ايه ده هو انتوا لحقتوا اعد يا راجل, يا ريت و الله بس انت عارف المواصلات دلوقتي بتبقي عامله ازاي ,يالا يا حبيبي (بينادي علي العفاريت عياله) يجوا جري يا بابا علشان خاطري نص ساعه بس يا بابا و يفضل يزن و يخنق باباه فيقوله طب خمس دقايق كمان و خلاص و يطلع الولد يجري قبل ما بابا يكمل كلامه .

خلاص الناس حيمشوا بقي (وهما واقفين يلبسوا الجزم) بس المره دي مش محسوبه(الناس اللي بيتزاروا) انا بقي نفسي اعرف امتي الناس بتتحسب زيارتها ,المهم يردوا (الزوار) احنا جينالكم المره دي المره الجايه ابقوا نورونا و يبصوا علي العيال الصغيرين و يقولولهم خلوا بابا بيجيبكم عند عمو و طنط .

بس خلاص الزياره خلصت و الاسره كلها تطلع البلكونه و يبيبيوا لقرايبهم في الشارع !!!!

نفسي يبقي عندي باك !!!

احلي حاجه و انا بكتب علي الكمبيوتر ان في باك في اندوا في حاجات كتير ممكن اغير بيها اي حاجه انا كتبتها اصل انا باخد وقت كتير علي ما استقر علي اي شيء عايزه اكتبه .

هو انا بقول كده ليه ايه اللي فتح الموضوع اصلا اه الباك, المهم ان في حاجه انا نفسي تبقي موجوده في الواقع نفسي لو عكيت في الكلام اعمل باك بكل بساطه ولا كأن في حاجه ,اكيد بتقولو دلوقتي ليه ان شاء الله انا بقي حقولكوا ليه !!!!

.لأني للأسف بتنرفز بسرعه و اتعصب و تلاقيني بعك جامد جدا جدا في الكلام و بعد ما الموضوع بيخلص اقول يا خبرابيض هو انا قلت كده بجد و طبعا شكلي بيبقي و حش مش قادره اقولكم قد ايه و ببقي نفسي ارجع بالزمن علشان اغير كلامي لكن للأسف الكلام ده مستحيل و مش حينفع طب ايه الحل ؟؟؟؟

الحل اني اهدي شويه علشان افكر قبل ما اعك و ابوظ الدنيا و الناس اللي انا بحبهم ميزهقوش مني و يطفشوا مني الموضوع ده بقي مستفحل عند المصريين (و مستفحل يعني مستشري ) اهم حاجه اني اوضح كلامي و ميكونش مجعلظ (مجعلظ يعني مأفور)

المهم , الناس طول النهار بتتخانق و محدش بيكلف خاطره انه يكبر دماغه ويعدي المواضيع و تلاقي كل واحد فاكر للتاني بلاوي من سالف العصر و الاوان و طول النهار الناس واقفين لبعض علي الواحده و اكيد سمعتوا الجمله المشهوره بتاعت الخناق" ايه انت قلت ايه انت قد الكلام ده؟! " و هكذا

بس فعلا احنا لازم نخلي بالنا من كلامنا و نكبر دماغنا بدل ما نعمل مشاكل علي الفاضي و الحكايه اصلا مش مستحقيه , و بعدين كلنا بقينا مخنوقين و كل واحد عايز يطلع غيظه في اللي حواليه علشان كده لازم نستحمل بعض
يا رب اقدر اضبط لساني علشان انا خلاص قربت ازهق منه !!!!