زي القمر

مش عارفه ليه بحس بأحساس غريب اول ما اشوف القمر

طبعا القمر من اجمل ما في الطبيعه وامتعه للنظر

لكن بحس انه اكتر الاشياء المزيفه في حياتنا
القمر جميل اوي مضيء مبهر لكن لما بنشوفه هنا من بعيد من الارض

لكن حقيقته انه عباره عن صخور و تعاريج و براكين اصلا مكان موحش محدش يحب يعيش فيه

في ناس كتير في حياتنا زي القمر جمال اوي طيبين حنونين اقوياء لكن الحقيقه عكس كده من جوه مش كده
مش ضروري يكونوا و حشين لكن المشكله انهم متصنعين

مشكلتي مع الناس دول انهم بيخدوا مني حقي في اني اعرفهم علي حقيقتهم و حقي اني ابعد او اختار تقبلهم بس زي ما هما من غير تزيف

كل سنـة وإنتم طيبين

كل سنة وإنتم طيبين بمناسبة العيد .. يا رب يكون عيد سعيد علينا كلنا .

وكل سنة وإنتم طيبين كمان بمناسبة بداية العام الدراسي الجديد

ربنا يقوينا جميعاً

تاج

اختنا في الله بعتتلي تاج صعب حبتين و لازم اوضح اني حليته تحت تهديد السلاح و يا رب اكون حليته كويس و ربنا يسامك يا اسماء

1- الحاله الجسمانية بمعنى هل سيادتك تتمتع بصحة جيدة ولا الاخ صاحب مرض؟

لا الحمد لله صحتي كويسه بس في حاجات بسيطه كده زي الحساسيه و دي الحمد لله مش امر اض زي ما اختنا في الله ما قالت


2-الحاله الاجتماعية بمعنى هل علاقتك بمن حولك جيدة ولا عامل مشاكل مع طوب الارض ؟

لا الحمد لله مفيش مشاكل مع حد خصوصا اليومين دول حتي الناس اللي كنت شاده معاهم ال حمد لله بقينا نتعامل عادي , يا رب دايما


3-الحاله العقلية بمعنى هل تشعر ان عقلك يعمل ولا حضرتك منيم دماغك ؟

يا ريت اعرف انيمه كنت ارتحت , انا مخي شغال طول النهار و الليل لدرجه اني بيجيلي ارق كتير و مبعرفش انام كويس


4-الحاله العاطفية مش محتاجةتفسير ومش عايز استعباط ؟

مفيش اي حاجه خالص


5-الحاله الروحية بمعنى هل علاقتك بربنا كويسة ولا الكلام على ابو لهب ؟

الحمد لله في تحسن و يا رب تكون كده علي طول خصوصا اننا في رمضان و كده كده الروحانيات بتزيد ربنا يثبتنا بعد رمضان يا رب

الخمس اسئلة اللى جاية دى اسئلة متنوعةا

الاول : اكتر عيب فيك ونفسك تتخلص منه ؟

دول بقه اللي كتير اوي بس الحاجه الاساسيه اني نفسي اطوع نفسي و اتحكم فيها 100% لاني للأسف حنينه شويتين مع نفسي


الثانى : ايه الحاجة اللى عملتها وندمت انك عملتها قوى ؟

اي مره عملت فيها ذنب او قصرت في حق حد او زعلت حد مني


الثالث : اية الحاجة اللى لسة معملتهاش وحتموت وتعملها ؟

حاجات كتير نفسي اتخرج بتقدير عام جيد جدا ( حاجه مشتركه بيني و بين اختنا في الله ) , و نفسي احج و نفسي اعمل حاجه للإسلام و نفسي اكون ناجحه في حياتي و في شغلي و نفسي اشتغل اصلا و نفسي ارتبط بأنسان كويس و يكون عندي اطفال زنانين و يزهقوني و نفسي ارضي امي و ارد لاهلي بعض افضالهم عليا و نفسي اكون متدينه اوي و نفسي ربنا يرضي عني و ادخل الجنه مع كل اهلي و احبابي .

الرابع : اكتر دعاء بتقوله وبتردده دائما؟

يا رب ثبت قلوبنا و اعفو عنا و رقق قلوبنا

الخامس : لو عرفت انك هتموت دلوقتى وقالولك اخر حاجة نفسك فيها ايه ؟

اصلي و استغفر وادعي ان ربنا يعفو عني و يغفرلي و يسامحني و يجمعني بأحبابي في الجنه ان شاء الله


ابعت التاج ده لكل زواري في المدونه

رمضان كريم

كل سنه و انتم طيبين و بخير و سعاده يارب و انا عايزه اعتذر علي التأخير في الرد علي تعليقات حضراتكم و كمان متابعه مدوناتكم الجميله جدا لظروف غصب عني و الله.

انا شخصيا مش مصدقه ان السنه جرت بسرعه اوي كده و خلاص احنا في اجمل شهر في السنه اكتر حاجه بحبها في رمضان ان مفيش شياطين و الناس بتحاول تكون كويسه علشان الصيام و احلي كلمه ممكن اي حد يسمعها (اللهم اني صائم).


لازم قبل رمضان تكون عندنا خطه للحاجات اللي عايزين نعملها علشان الوقت بيجري بالورقه و القلم زي ما اختنا في الله ما قالت .


و افضل حاجه في رمضان ان اللي عايز يبطل اي حاجه مضايقاه في نفسه وعايز يغيرها ان شاء الله يقدر يغيرها في رمضان علشان رمضان شهر جهاد للنفس

ربنا يبلغنا رمضان و كل اللي نفسه في حاجه بنا يا رب ينولهاله و نكون احسن ان شاء الله بعد رمضان


و نتقابل ان شاء الله في العيد

تااااااااااااج

وصلني تاج من حسن حنفي و من اختنا في الله و انا بشكرهم عليه اوييييييي و انا اسفه جدا جدا الني اتأخرت في الاجابه عليه

س1 : أذكر خمس أحلام على الاقل ..تخص ماضيك

اكون طبيبه نفسيه لأني مساعده الناس اوي و حتي لو مقدرتش اديهم راي علي الاقل بحاول اسمعهم و ده بيريح كتير
اكون صحافيه
اكون مدرسه ابتدائي اللي بتدي كل المواد ,بس هي دي الحاجات اللي انا فاكراها


س2 : أذكر خمس أحلام على الاقل ..تخص مستقبلك

اعمل مكتب ديكور ناجح
ابني ملجأ
اطلع من الكليه بتقدير عام كويس
ارتبط بانسان كويس و يكون عندي ولاد ناجحين وسعداء , بس كده


س 3 : اذكر شخصين علي الاقل غير متواجدين في حياتك حاليا و كنت تريد و جودهم الآن في حياتك او حياه اولادك مستقبلا

جدتي والده والدتي رحمها اللله و جد والدتي رحمه الله


س4: اهديتك 3 وردات مين هم الاشخاص الي هتديهم الورد اللي معاك

الأولي لأسرتي ماما و بابا و اخواتي و الثانيه لأهلي و اصدقائي و الثالثه لكل انسان علمني اي شيء في حياتي سواء بنصيحته ليل او بضرر سببهولي


س5:لو اعطيتك و رقه بها 3 سطور و قلت لك اكتب اللي انت عايزه حتكتب ايه

السطر الاول حقول يا رب تمر الايام اللي احنا فيها دي بسرعه كلها مشاكل و ملل و تقريبا كل اللي اعرفهم في حاجه مزعلاهم و كمان نفسي حال البلد بتحسن

السطر التاني ليه الناس مبقتش بتخاف علي بعض و لا بتحس ببعض و كل واحد بيجرح اللي حواليه علشان مصلحته نفسي سلوك الناس يكون سلوك بني ادمين مع بعض و بلاش القهر اللي بفي موجود في كل حته في الدنيا

السطر التالت حقول : ضاقت فلما لستحكمت حلقاتها فرجت و كنت اظنها لا تفرج

س6 : ما هو هدفك في الحياه

نفسي اكون انسانه ناجحه و اكون مفيده للناس


س7: بكره احسن من النهارده هل تصدق هذه المقوله و لماذا !

الحمد لله انا عندي ثقه كبيره في ربنا و في ان ربنا مش حيسيبنا و ان ربنا معانا و حيوفقنا , و بعدين لو مكنتش المقوله دي حقيقه كان النكد هو العادي الناس مش حتتضايق لان هي دي حياتهم


س 8 : اجمل مقوله في حياتك

كتير اوي بس انا بحب مقوله " السعاده كالفراشه اذا طاردتها هربت منك و اذا تجاهلتها رفرفت فوق كتفيك "


س9 : من المغني اللي بتحبه اوي

مفيش حد بحبه اوي لكن انا بحب اغاني عمرو دياب و شرين و اليسا


س10 : ايه الاغنيه اللي بتحبها

مفيش حاجه معينه بس بحب الاغاني اللي فيها احساس


س11:غزه تمثل ايه في حياتك

تمثل وجع في قلبي و احساس بالعجز لان الناس اللي هناك اهلنا و جراننا و مش عارفين نعمل لهم حاجه ربنا يعينهم


س 12 :اعطي لانتمائك لوطنك درجه

100% انا بحب مصر اوي و نفسي تكون احسن بلد في الدنيا

س13 : عمرك غشيت في امتحان و انت صغير

ايوه و بلاش احراج


س 14 : لو اتعرض عليك رشوه و انت في زنقه مالسه حتعمل ايه

ده اسهل سؤال في التاج كله علشان انا الحمد لله مش مزنوقه لكن السؤال ده حيكون صعب اوي لو كانت الظروف دي موجوده , ان شاء الله لا ربنا يعصمنا من انفسنا

س15 : لو انجبت بنتين و ولدين اي اسما ء حتختارها لهم

الولاد ياسين و حمزه و البنات جيداء و جنه


س16 : قول 3 صفات تصف بيها شخصيتك

طموحه , مبنساش لا الاساءه ولا الاحسان , بحاول اتعلم من اخطائي


س17 : صفه عايزها في شريك حياتك

صعب اوي اقول صفه و احده بس انا اتمني انه يكون مثلي في الطباع و السلوك و التفكير


س18 : ايه المجال خارج تخصصك و شايف نفسك فيه

التسويق و الدعايه و الاعلانات


س19 : بتحب السفر

اوي السفر ده اكتر حاجه انا بستمتع بيها في حياتي


س20 : دلوقتي ايه المكان اللي نفسك تكون فيه

نفسي اكون في الحرم المكي و الحرم المدني


س21 : تمرر التاج ده لمين

لكل اللي حينوروا مدونتي بتعليقاتهم

منورنا والله !!!

لو بصينا علي اي زياره في البيت من اي اسره مصريه لاي اسره مصريه حنلاقيها استمبه نفس الحاجات و التصرفات بتحصل مع كل الناس و كل الناس بيعملوها مثلا

اول ما تتدخل عند قرايبك البيت و انت لسه علي العتبه تلاقي زي صوت جز علي السنان خفيف مع تبريقه و طرقعه في الصوابع علشان تقلع الشوز قبل ما تدخل, و الحركات بقي اول ما تبتدي تقلع يقولولك ليه كده خليك براحتك!!

اول القاعده حوالي نص ساعه كلام عن الحر و الرطوبه و العطش تلاقي نفسك اصلا فرهدت من الكلام

بعد شويه تلاقي الناس اتقسمت معسكرات معسكر الستات و الكلام كله بيتمحور حول الطماطم و الكوسه وبتستخدمي اي نوع من السمنه و البند الجديد الاسعار اللذيذه بتاعه اليومين دول

المعسكر التاني معسكر الرجال و كل الكلام بيكون يا علي الكوره يا علي الموبايلات يا علي العربيات

المعسكر التالت الاولاد الصغيرين اول ما بتلموا علي بعض يلعبوا حرب و تلاقي كميه مسدسات غريبه و نط من عل السرير و موت موت يا ابني انا بموتك موت!,او تلاقيهم متنحين في الكمبيوتر و بيلعبوا حاجه فيها موت برضه!

المعسكر الرابع البنات الصغننين بيلعبو بالعرايس و هارينهم تلوين علي وشهم و تغيير في هدومهم

المعسكر الخامس ده مكون مني انا او اللي زي حالاتي اللي مش منتمين لاي معسكر ولا هما كبار يقعدوا مع الكبار و لا صغننين , و عمالين بيلفوا في البيت او بيتفرجوا علي التليفزيون

حوالي ساعه الا ربع كمان و يالا اتغدوا معانا لا و الله احنا لسه واكلين -نفسي اعرف الناس ليه بياكلوا و ينزلوا المهم- و طبعا حتلاقي نفسك محشور في كرسي السفره و بتاكل عادي جدا

بعد شويه الشاي للكبار و حاجه ساقعه او عصير للصغيرين -بصراحه انا ابتديت احس اني كبرت لما بقي يتعملي شاي في الزيارات - طبعا هما مش بياخدوا رأيك الا في موضوع السكر غير كده انت حتشرب الشاي غصب عنك.

في و قت الشاي كل الكبار بيتكلوموا في اي حاجه في الدنيا ة اول ما الكلام يخلص الجمله الرسميه منورنا والله يا جماعه و لو تعد مش حتقل في الزياره الواحده عن حوالي 19 مره .

خلاص بقي قرار انهاء الزياره بيبتدي ببصه من الاب للام (الزوار) لها معني كفايه كده ايه رأيك نمشي تقوم الام تبصي بنظره معناها اه كفايه كده .

الاب يقوم و يقول نستأذن بقي و الاب التاني ايه ده هو انتوا لحقتوا اعد يا راجل, يا ريت و الله بس انت عارف المواصلات دلوقتي بتبقي عامله ازاي ,يالا يا حبيبي (بينادي علي العفاريت عياله) يجوا جري يا بابا علشان خاطري نص ساعه بس يا بابا و يفضل يزن و يخنق باباه فيقوله طب خمس دقايق كمان و خلاص و يطلع الولد يجري قبل ما بابا يكمل كلامه .

خلاص الناس حيمشوا بقي (وهما واقفين يلبسوا الجزم) بس المره دي مش محسوبه(الناس اللي بيتزاروا) انا بقي نفسي اعرف امتي الناس بتتحسب زيارتها ,المهم يردوا (الزوار) احنا جينالكم المره دي المره الجايه ابقوا نورونا و يبصوا علي العيال الصغيرين و يقولولهم خلوا بابا بيجيبكم عند عمو و طنط .

بس خلاص الزياره خلصت و الاسره كلها تطلع البلكونه و يبيبيوا لقرايبهم في الشارع !!!!

نفسي يبقي عندي باك !!!

احلي حاجه و انا بكتب علي الكمبيوتر ان في باك في اندوا في حاجات كتير ممكن اغير بيها اي حاجه انا كتبتها اصل انا باخد وقت كتير علي ما استقر علي اي شيء عايزه اكتبه .

هو انا بقول كده ليه ايه اللي فتح الموضوع اصلا اه الباك, المهم ان في حاجه انا نفسي تبقي موجوده في الواقع نفسي لو عكيت في الكلام اعمل باك بكل بساطه ولا كأن في حاجه ,اكيد بتقولو دلوقتي ليه ان شاء الله انا بقي حقولكوا ليه !!!!

.لأني للأسف بتنرفز بسرعه و اتعصب و تلاقيني بعك جامد جدا جدا في الكلام و بعد ما الموضوع بيخلص اقول يا خبرابيض هو انا قلت كده بجد و طبعا شكلي بيبقي و حش مش قادره اقولكم قد ايه و ببقي نفسي ارجع بالزمن علشان اغير كلامي لكن للأسف الكلام ده مستحيل و مش حينفع طب ايه الحل ؟؟؟؟

الحل اني اهدي شويه علشان افكر قبل ما اعك و ابوظ الدنيا و الناس اللي انا بحبهم ميزهقوش مني و يطفشوا مني الموضوع ده بقي مستفحل عند المصريين (و مستفحل يعني مستشري ) اهم حاجه اني اوضح كلامي و ميكونش مجعلظ (مجعلظ يعني مأفور)

المهم , الناس طول النهار بتتخانق و محدش بيكلف خاطره انه يكبر دماغه ويعدي المواضيع و تلاقي كل واحد فاكر للتاني بلاوي من سالف العصر و الاوان و طول النهار الناس واقفين لبعض علي الواحده و اكيد سمعتوا الجمله المشهوره بتاعت الخناق" ايه انت قلت ايه انت قد الكلام ده؟! " و هكذا

بس فعلا احنا لازم نخلي بالنا من كلامنا و نكبر دماغنا بدل ما نعمل مشاكل علي الفاضي و الحكايه اصلا مش مستحقيه , و بعدين كلنا بقينا مخنوقين و كل واحد عايز يطلع غيظه في اللي حواليه علشان كده لازم نستحمل بعض
يا رب اقدر اضبط لساني علشان انا خلاص قربت ازهق منه !!!!

كلام أفلام

من فتره كده كنت بتفرج علي فيلم عربي او مسلسل و الله ما فاكره المهم كانت الممثله متأثره جدا و بتقول العمر بيتحسب باللحظات الحلوه الي احنا عاشناها اكيد انتوا سمعتوا الجمله دي في اي حاجه عربي قبل كده .

الموضوع بصراحه علق في دماغي و قعدت افكر هو عمرنا فعلا بيتحسب ازاي؟ بيتحسب ازاي يا بنت يا لولو, بيتحسب ازاي يا بنت يا لولو .

و بعد تفكير عميق بصراحه هو مش عميق و لا حاجه المهم اهو تفكير و السلام كفايه لك نرجع مرجوعنا لقيت ان عمرنا بيتحسب عادي جدا بالايام و السنين عادي خالص لكن الفكره اللي شغلت دماغي بعد كده هي ان في ايام كامله و ساعات اسابيع بتروح كده علي الفاضي بتخلص كأنها محصلتش - انا بتكلم عن نفسي مش عارفه انتوا حاسين بكده و لا ايه -و ده يخليني أسأل نفسي سؤال رفيع ازاي يكون اليوم مخلصش علي الفاضي (سؤال وجيه مش كده انا قلتلكم قبل كده اني طول عمري لماحه)

وبما ان الموضوع كبير فأنا لو سمحتم يعني محتاجه رأيكم فيه يا ريت تقولولي امتي بتحسوا ان يومكم كان مفيد او كان ممتع او كان كئيب -لا قدر الله- المهم انه يكون فيه احداث يكون فيه معني يكون فيه حاجه تتحكي .

علي ارتفاع كام ؟؟؟؟؟

هل انت مؤدب؟؟؟؟
طبعا اه.... متفكرش..... ده شيء انا متاكده منه
بصراحه!!!! انا مش متاكده اوي .
اكيد بتقولوا دلوقتي آلاء ابتدت تعك لكن بس اسمعوني للآخر

أنا متاكده أن كل واحد من حضراتكم انسان غايه في الذوق و الاحترام
(بحاول اصلح العك اللي فوق) بهزر بهزر فعلا هي دي الحقيقه
لكن انا قصدي, انت مؤدب مع نفسك ؟؟؟؟ يعني ايه
اقولكم يعني ايه
يعني انت بتقول لنفسك انا غبي ,انا حمار ,انا فاشل اي حاجه يعني من الحوارات دي
و لا بتقول انا كويس ,انا ناجح ,انا كفاءه يعني
لوكنت من النوع التاني انا بحييك علشان انت عارف قيمه نفسك ,قيمه ان ربنا خلقك
و شرفك انك تكون خليفته في الارض

لكن لو كنت من النوع الاول فاحنا سهرتنا صباحي لحد ما ان شاء الله حقنعك
بص بقي يا سيدي في حاجه في علم النفس بتقول ان العقل الباطن بتاعك جاهل مبيعرفش حاجه
(مع احترامي لعقلك الباطن) بس دي الحقيقه و انت اللي بتعلمه وعلي الأساس ده هو بيتصرف
علشان كده اللي بيقول لنفسه انا فاشل بيفشل فعلا

اه و الله بيفشل بجد وحقيقي لانه من جواه اوي مش مصدق انه ممكن يكون انسان ناجح زي مخاليق ربنا

- الكلام ده مع الشغل و يعمل اللي عليه لحد ياخدها حجه و يريح و يقول انا ناجح طبعا ده يبقي انسان كسلان و قبل كل ده التوكل علي الله-

المهم ان اللي في الحاله دي مبيكونش عنده امل انه يحقق اللي نفسه فيه فيفضل ينزل في سقف طموحاته
لحد ما يوصل( لارضيه الطموح) مثلا حد نفسه يبقي مدير لشركه يفضل يقول لنفسه انا ازاي حبقي المدير
ده انا اساسا انسان كسول و خايب و يفضل يقلل من قيمه نفسه لحد ميلاقي الناس بتجري من حواليه و هو عايش
في وهم انه انسان فاشل و يضيع علي نفسه الاستمتاع بالعمل و السعي وراء حلمه و المتعه الكبري و هي الاستمتاع
بالوصول للنجاح ان شاء الله .......

معلش طولت عليكم بس في حاجه اخيره نفسي اقولها الانسان علي قد حلمه لو نفسك في حاجه مستحيله في عيون الناس
و الحلم ده تملكك خليك واثق من نفسك و من قدراتك و اتعب اربط الحزام اوي و اجري باقصي سرعه عندك

و افتكر ان ربنا معاك و حيكافئك و حيفتحلك سكك للنجاح
و اوعي اوعي ترضي باقل من حلمك ومن طموحك

بالنسبه ليا انا نفسي اوصل للسماء و احيانا بيبقي نفسي اوصل لأبعد من كده بصراحه انا طموحي مالهوش سقف
و ان شاء الله حوصل للي انا نفسي في
وانت يا تري سقف طموحك علي ارتفاع كام !!!!!!!!

كنت قاعده انا و أسماء صاحبتي ( اللى هى أختكم فى الله بتاعة مدونة أجمل أيامنا) في محطه بولكلي بناكل السندويتشات علشان احنا هفتانين وتعبانين يا عيني اصل كان اليوم طويل و شايلين حاجات كتير.

المهم كنت بقول ايه !!

اه وا حنا قاعدين لقيت نفسي بضحك بصتلي سمسم باستغراب - بصراحه هي مبصتش باستغراب ولا حاجه اصلها واخده علي اللسعان بس انا بقول كده علشان المنظر متقولوش بقي لحد- المهم قالتلي: " انتي عبيطه يا للوله ؟؟؟ "

(اصلنا صحاب من زمان و بنحب و بنحترم بعض اوي ) مردتش و قلتلها سمسم انا جيلي سمسم قالتلي ايه عايزه تدخلي التلاجه يعني هههههههه مش قلتلكم احنا صحاب قوي.

المهم قلتلها لايا بنتي انا قصدي اني مبقاش ليا معالم كل حاجه بتتكركب فوق دماغنا و احنا سايبنها تعمل فينا اللي هي عايزاه فينا لحد مبقاش لينا معالم زي الجيلي ملوش شكل حطيه في اي حاجه مش حيقول لا.. مستسلم و سايبنا نعمل فيه اللي احنا عايزينه براحتنا خالص.

المهم اننا اتكلمنا فى الموضوع ده وحاولنا نعرف المشكلة فين وحاولنا نقترح شوية حلول كدة على ادنا وبعدين ..

قالتلي خلاص متيجي تعملي مدونه اكتبي فيها اللي انتي عايزاه و قولي ياستي رايك في كل حاجه قلتلها بجد هو انتي تعرفي ازاي قالتلي طبعا المهم قومي خلينا نشرب عصير قصب اصل الجو حر اوي ومن هنا قررت اعمل مدونه وجاه اسم الجيلي .
ان شاء الله في المدونه دي ححاول اقول رأيي في اللي حوالينا و في الحاجات اللي بتلفت نظري لكن ده ميمنعش اننا نضحك ونهزر وده يخليني ادخل في حاجه خطيره اخد بالي منها وهي

طفره جينية

وانا بتفرج في الصور القديمه بتاعتي و بتاعت ماما وبابا و اخواتي لقيت حاجه غريبه خلتني اقوم ابص في المرايا بسم الله الرحمن الرحيم هو انا مالي بقي بيتهيألي حاجات و لا ايه و رحت اسال ماما مامتي حبيبتي اوصفيلي وشنا شكله ايه؟؟

قالتلي الاء روحي بقي انا مش فاضيالك خليني اخلص الاكل - بس طبعا الفوليوم كان اعلي –

المهم قلتلها لا بجد عايزه اعرف قالتلي اللهم طولك يا روح العينين و المناخير و البق و الودان ......

قلتلها امال الميه و حداشر (111) دي بتاعت ايه قالتلي اه انتي قصدك عليها دي يا بنتي طفره جينيه بعد ما الناس بقت بتموت في طوابير العيش وفي امتحانات الثانويه العامه و كيلو اللحمه بقي ب 50 جنيه قلتلها اه يعني اصلا اصلا احنا مش مولودين بيها قاليتلي الله يخرب بيتك نسيت الاكل علي النار و ماما طلعت تجري.

المهم احنا لازم نقاوم ونخلي الحكومه الذكيه بتاعتنا تنزل علي الميزانيه السريه بتاعتها بند لمقاومه الطفره الجينيه اللي بقت عند المصريين .