كنت قاعده انا و أسماء صاحبتي ( اللى هى أختكم فى الله بتاعة مدونة أجمل أيامنا) في محطه بولكلي بناكل السندويتشات علشان احنا هفتانين وتعبانين يا عيني اصل كان اليوم طويل و شايلين حاجات كتير.

المهم كنت بقول ايه !!

اه وا حنا قاعدين لقيت نفسي بضحك بصتلي سمسم باستغراب - بصراحه هي مبصتش باستغراب ولا حاجه اصلها واخده علي اللسعان بس انا بقول كده علشان المنظر متقولوش بقي لحد- المهم قالتلي: " انتي عبيطه يا للوله ؟؟؟ "

(اصلنا صحاب من زمان و بنحب و بنحترم بعض اوي ) مردتش و قلتلها سمسم انا جيلي سمسم قالتلي ايه عايزه تدخلي التلاجه يعني هههههههه مش قلتلكم احنا صحاب قوي.

المهم قلتلها لايا بنتي انا قصدي اني مبقاش ليا معالم كل حاجه بتتكركب فوق دماغنا و احنا سايبنها تعمل فينا اللي هي عايزاه فينا لحد مبقاش لينا معالم زي الجيلي ملوش شكل حطيه في اي حاجه مش حيقول لا.. مستسلم و سايبنا نعمل فيه اللي احنا عايزينه براحتنا خالص.

المهم اننا اتكلمنا فى الموضوع ده وحاولنا نعرف المشكلة فين وحاولنا نقترح شوية حلول كدة على ادنا وبعدين ..

قالتلي خلاص متيجي تعملي مدونه اكتبي فيها اللي انتي عايزاه و قولي ياستي رايك في كل حاجه قلتلها بجد هو انتي تعرفي ازاي قالتلي طبعا المهم قومي خلينا نشرب عصير قصب اصل الجو حر اوي ومن هنا قررت اعمل مدونه وجاه اسم الجيلي .
ان شاء الله في المدونه دي ححاول اقول رأيي في اللي حوالينا و في الحاجات اللي بتلفت نظري لكن ده ميمنعش اننا نضحك ونهزر وده يخليني ادخل في حاجه خطيره اخد بالي منها وهي

طفره جينية

وانا بتفرج في الصور القديمه بتاعتي و بتاعت ماما وبابا و اخواتي لقيت حاجه غريبه خلتني اقوم ابص في المرايا بسم الله الرحمن الرحيم هو انا مالي بقي بيتهيألي حاجات و لا ايه و رحت اسال ماما مامتي حبيبتي اوصفيلي وشنا شكله ايه؟؟

قالتلي الاء روحي بقي انا مش فاضيالك خليني اخلص الاكل - بس طبعا الفوليوم كان اعلي –

المهم قلتلها لا بجد عايزه اعرف قالتلي اللهم طولك يا روح العينين و المناخير و البق و الودان ......

قلتلها امال الميه و حداشر (111) دي بتاعت ايه قالتلي اه انتي قصدك عليها دي يا بنتي طفره جينيه بعد ما الناس بقت بتموت في طوابير العيش وفي امتحانات الثانويه العامه و كيلو اللحمه بقي ب 50 جنيه قلتلها اه يعني اصلا اصلا احنا مش مولودين بيها قاليتلي الله يخرب بيتك نسيت الاكل علي النار و ماما طلعت تجري.

المهم احنا لازم نقاوم ونخلي الحكومه الذكيه بتاعتنا تنزل علي الميزانيه السريه بتاعتها بند لمقاومه الطفره الجينيه اللي بقت عند المصريين .